Friday, October 10, 2008

كوسة انتخابات الطلبة


مفيش فايدة ! قالوا ان جو الحرية والديمقراطية اتسع في البلاد كلام آه تطبيق لأ ،تحدثوا عن تفعيل دور الشباب السياسي في المجتمع كلام آه ، تطبيق لأ ، أقسموا بالطلاق ثلاث مرات أن انتخابات اتحادات الطلبة في الجامعات نزيهة كلام آه تطبيق لأ ولا عزاء لسيدات المسئولين المحترمات0


تقريبا هذه هي السنة الرابعة التي أقوم فيها بتغطية انتخابات اتحادات الطلبة ، أقدر أقول مفيش جديد فقد تغير وزيران ونفس الوعود تقال دون تطبيق ما يحدث هو كوسه بمعني الكلمة0


بس هناك فارق كبير لا يستطيع أن يستوعبه الا من هو داخل المطبخ العملي كان زمان هناك اعتراف من قبل المسئولين أن هناك احجام من الطلاب عن المشاركة الانتخابية داخل الجامعة أما الان فعن طريق الارقام والاحصائيات هناك بقدرة قادر 16 ألف طالب وطالبة رشحوا انفسهم في الانتخابات يعني كده حلو قوي شبابنا بخير والحمد لله ويطلع المسئول تاني يوم مفتخرا بدوره العظيم في تشجيع الطلبة على المشاركة ويصف المسئول في وسائل الاعلام كم تكبد من جهود وأموال ، ويعيني الطلبة أصلا في سنة رابعة لا يعلمون يعني ايه انتخابات؟




وللاسف هذا ليس خطئهم بل خطأ اللي بالي باللك فهناك تكتم شديد وحرص على عدم الاعلان عن أي تفاصيل كأن وضع لافته داخل الكليات عن الموعد يعد سر من الممكن أن يهدد الامن القومي الجامعي فتخيلوا لو عرفت مثلا اسرائيل موعد الانتخابات الطلابيةربما تاني يوم سنجد الطيارات الاسرائيلية تقصف مواقع الجامعات أو ربما ستستعمل سر حربي بيولوجي للقضاء على شبابنا المتحمسين دون قطرة دم واحدة0


بعيدا عن التخيلات اذا نزلنا أرض الواقع نجد أن الطالب كل طالب بيدفع تقريبا 15 جنيه نظير الانشطة والاتحاد الطلابي ولكن هل اجتهد احد في تعريف الطلاب بماهية الاتحادات ؟ أقول بثقة لا وألف لا0


طيب هل شرح له أحد كيف تجرى الانتخابات وما هي فائدتها ؟ أقول بثقة أيضا لا وألف لا ، طيب هل شرح له في الجامعة يعني ايه سياسة ربما نعم في كليات الاعلام والاقتصاد والاحصاء ولكن هل هناك نشاط سياسي لتعريف الطلاب بالبرلمان ونظام الحكم ؟ أقول لا وألف لا0



عندما كنت في كلية الاعلام جامعة القاهرة درسنا معظم نظم الحكم في الدول الا بلدنا مصر ليه معرفش كل ما اتذكره ان الدكتور كان بيحاول يجاوب على سؤال لطالب مذاكر كويس من اللي بيقعدوا في الصف الاول -على فكره انا كنت قاعده في نفس الصف- وسأله عن طبيعة النظام بتعانا فكان الرد ده مختلط من ده على ده وأغلق الحديث0





فجأة تعلن الانتخابات كل عام ودائما أصبح لها مؤشرات تحتاج لأن يكون هناك محقق مثل كونن لكي يعرف موعدها فمثلا هي شيئ يأتي بعد الاجازات مباشرة حيث غالبا ما يتغيب طلاب الاقاليم وهم كثر بالمناسبة،كما انها شيئ بيكون في بداية الدراسة قوي علشان الطلاب بتكون لسه مدفعتش المصروفات وبالتالي لا يحق لنسبة كبيرة منهم دخول الانتخابات طبقا للائحة الطلابية المبجلة،آه نسيت كثرة التحقيقات ومجالس التأديب للطلاب الناشطين وأحيانا اعتقالات وتهذيب ودخول بلطجة الجامعات0



هل عرفتم موعدها ؟ قولوا عروستي أقولكم انها بدأت عقب اجازة العيد وفي الاسبوع الثالث لبدء الدراسة و"اقدر أقول ان صاحب الاعلان عنها ليسوا رؤساء الجامعات المحترمين ولكن جهة أخرى ليست للنشر" ، على فكره هذا ليس كلامي فقد استعرته من مسئول كبير بوزارة التعليم العالي حفظه وأدام له منصبه هو ورؤسائه وجعلهم ذخيرة لمصر0

21 comments:

SHAPE YOUR LIFE (ABOALI) said...

ياااااااااااا سلام عليكى يا كوسه
وانتى منورة
ياااااااااااااا سلام عليكى وانتى عنوان مش منظره
ايه الحلاوه دى يا مسكرة
من خوفى عليكى خايف من المسخرة
الناس دايما ظلماكى
وبيقولوا عليكى كلام
وانا اقول دايما انه اوهام
واقول دايما ليه الكوسه
مافيه كمان بتنجان
هو علشان انا ناعمة وطريه
وكلى كده حنيه
وخضرا كده ومش غبيه
طب ذنبى ايه
انى مطلوبه فى كل مكان
غطتكوا يا بشر
انى الكرسى
مش تيفال



يااااااااااااااااا سيدتى
شر الباليه ما يضحك

شبــ اون لاين ـــاب said...

كوسه يا سلام مبكلهاش
مش مهم بس كوسه ايه بس حرام عليكى تظلميهم
مصر بطبق نظام المواجه
يعنى ايه
فى فساد توجه بالفساد
فى سرقه من الشعب توجه بسرقه من اللهم احفظنا منهم
ههههههههه
هى دى مصر
ربنا يرحمنا

JOKER

شهرزاد said...

انتي الظاهر عليكي صحفية
فما تكتبينه وما يهمك من مواضيع يدل على ذلك
وأنت ما شاء الله متميزة في هذا المجال
أرجو لك التوفيق دائما
شهرزاد

Here i'm said...

مثال بسيط قوى ..

أتحاد طلاب فرنسا غير مسار قانون العمل و كان قائده شاب عنده 20 سنة على ما اعتقد ..

أتحاد طلاب مصر غير مسار الرحلات من رشيد و أدفينا للغردقة و شرم

dalia said...

أبو على
كلمات خفيفه على القلب شكرا وان كنت قرأتها قبل كده تقريبا في مدونتك اتصور هذا والا كان الزهايمر عمل عمايله

dalia said...

شباب أون لاين
اسجل تحياتي لكم حضوركم دائم وهذا يسعدني ذلك وان كنت مش فاهمه النظام اللي كتبتوه في التعليق ما معنى نظام المواجه؟

dalia said...

شهرزاد
اخيرا طبعا انا صحفية مهنة البحث عن المتاعب بس التدوين ده عالم بجد جميل لانه بيعرفني بحد زيك وان كنت اريد معرفة بعض الامور عنك لماذا ، شكرا على تعليقك اتمنى أن اكون كذلك فعلا

dalia said...

محمد

فعلا يا محمد نشاط الطلبه كله دلوقتي حفلات غنائية ورحلات دريم بارك واسكندرية واسوان وشرم الشيخ مفيش نشاط سياسي الافي كلية سياسة واقتصاد ، انا مش معترضه على الرحلات بس تكون لها هدف يعني انا طول عمري في الجامعة نفسي أروح الواحات البحرية اماكن جديدة وايضا مفيده

شبــ اون لاين ـــاب said...

نظام الموجه مثلا واحد مريض بالسكر ياكل سكر كتير هو ده نظام المواجه

بمعنى تانى ان اى نظام بيطبق بيبقى فاشل
تحياتى

joker

Yasmine said...

كله كوم و كراتين المكرونة اللى كانت بتتوزع باسم الحزب الوطنى فى جامعة القاهرة كوم تانى خالص
حتى اصوات طلبة اكبرهم عنده عشرين سنة لا ليهم تأثير ولا هيفرقو فى حاجة بقت بتتباع و تشترى حاجة تزهق والله

*الطالبة عفو الله *زوزو said...

فكرتيني في سنة اولى جامعة
في يوم من الايام بعد اجازة كدة بيوم او ثلاثة روحت قالولي زملائي عرفتي من نجح في الانتخابات قلتلهم انتخابات ؟؟؟
حيقولو ايه و لا ايه مهو محدش عرف الانتخابات اتعملت امتى و مين الى اترشح و ازاي تمت العملية الله اعلم
الي عرفناه النتيجة و بس
الله المستعان
الديموقراطية انعدمت في الزمن دة
بارك الله فيك اختي
ربنا معاك
في امان الله

SHAPE YOUR LIFE (ABOALI) said...

فعلا الزهايمر عامل عاميله
تفتكرى مش لازم نعمل حمله لمكافحة عن الزهايمر وما يساعد عليه
فكرى كده
تحياتى

alqassam said...

السلام عليكم
كوسة انتخابات الطلبة!!!!معاكى كل الحق فى ذلك فهى كوسة وتزوير من اعلى مؤسسة الى اصغر مؤسسة ..هذه اول زيارة لمدونتك وبصدق وانا اقرا فى البوستات لم اشعر انها مدونة شعرت اننى اقرا فى جريدة وتحقيقات قوية واسلوب صحفى اكثر من رائع ...الى الامام دائما ..ان شاء الله

محمد فاروق الشاذلى said...

تعودنا أن كلام التصريحات شيء والواقع شيء آخر
تذكرى كم مرة قرأتى فيها أنه لن يتم المساس بأسعار السلعة الفلانية ثم يرتفع بعد أيام قليلة وكم مرة قرأتى فيها أنه لن يتم خصخصة المشروع الفلانى ثم تفاجأتى بأن هناك لجنة تشكلت لتقييم المشروع تمهيداً لبيعه؟؟؟؟

dalia said...

شباب أون لاين
انا شايفه ان مفيش نظام من أصله عندنا عشوائية وجهات بتمشي كل حاجة على مزاجها شكرا على التوضيح

dalia said...

بنوته مصرية
هي وصلت الى المكرونه وبتتوزع داخل جامعة القاهرة كمان يا خسارة فاتت علي ديه انا كل اللي خت باللي منه هو الدعاية اللي عملها اتحاد الطلبة بتخفيض المصروفات ووعود برحلات مجانية بس طيب المرة الجاية ابقي نبهيني ويا سلام لو في صورة يبقى تمام التمام شكرا على الاضافة

dalia said...

الطالبة عفو الله أهلا وسهلا بيكي نورت المدونة أول زيارة واتمنى أن يدوم التواصل والود ، طبعا اوافقك الرأي أن هناك تعتيم شديد في الانتخابات ولكن من المهم في ظل هذا التكتم أن يكون كل طالب عنده وعي كامل بكل شيئ يجرى في الجامعة ويسأل بنفسه ويقرأ اللائحة الطلابية وهي موجودة بالمناسبة على الانترنت لازم نتغير أولا ونترك السلبية ولا نتحجج بالتعتيم شكرا مرة أخرى على مرورك

dalia said...

أبو على
اتصدق حلو قوي فكرة حملة الزهايمر ديه طيب معندكش حل أسرع شوية للناس اللي بينسوا من امثالي لا تبخل على بالنصائح لتنشيط الذاكرة فرغم انني صحفية بس كتير بفع في مشاكل بسبب النسيان بقعد أقول الراجل ده شوفته قبل كده فين فين فين

SHAPE YOUR LIFE (ABOALI) said...

بقعد أقول الراجل ده شوفته قبل كده فين فين فين
فين فين فى مصر ولا منين
اكيد اكيد شوفته فين فين فين
ندور فين فين
اه يا فين فين فين

طيب عليكى بالخضروات وخصوصا الجمبريات
واستعينى بالصلوات
واشتمى من الفل الفلات
ولا تنسى رؤية كل ماهو اخضارات
فى الحدائق والمتنزهات
يرتاح البال ولا يحمل هم الاهات

وعجبىىىىىىىىىىى

dalia said...

القاسم
أهلا بك في مدونتي ويسعدني اعجابك بالمدونة واهتمامك بمتابعة موضوعاتها اتفق معك فيما تقول ، اعذرني حاولت الدخول على مدونتك ولكن هناك مشكلة في الدخول لا اعلم سببها غير ان هناك رسالة تقول غير مسموح بالاطلاع على البروفيل اتمنى ان تعالجها شكرا مرة اخرى واتمنى الا تكون هذه آخر زيارة

dalia said...

قلب مصري
سعيده بمرورك بمدونتي عندك حق احنا بقينا بلد تصريحات تصريحات وبس