Sunday, June 3, 2012

يا راجع من الميدان



يا راجع من الميدان هات لي 
نسمة حرية...وبسمة تفاؤل...وأمل في بكرة جاي

أحكيلي على كل اللى شفته...ناس ألوان وأشكال 
وجوه سمرا وعيون صاحية 
وشباب حلف ما ينام إلا لما يا مصر يتغطى بعلمك 

أوصفلي شمس الميدان وترابه وهواه لسه نقي؟
الهوا هوانا 
لسه متغيرش نقي ككل ميادين الحرية

طيب والناس هي الناس؟ أيوه بس
القلوب تتجمع والهتاف يتوحد 
مرة سلمية ومرة زهقنا ومرة أرحل

وهدفهم اختلف؟ مش محددين الهدف
لكنهم على الأقل بيقاوموا ويقولوا لأ 
في وش القاضي اللى محكمش بالعدل
وساب الجلادين ينهشوا في لحمنا
وشمتهم فينا من ورا القفص

أمانة عليك لما تروح تاني تسلملي على أم الشهيد
وقولها إحنا مش ناسيين دمهم 
هما في قلبنا وعقلنا وأنت غالية يا أمي عندنا