Thursday, September 23, 2010

الناجحون بالرأفة

"لو عرفتم إن في طبيب نجح بدرجات الرأفة تحبوا تتعالجوا عنده في عيادته الاجابة آه بصوت عالي.

طيب لو عرفتم إن في المحامي نجح في الجامعة بدرجات الرأفة تترفعوا عنده، الاجابة آه بصوت عالي

يعني لو في مهندس بني عمارة وعرفتم إنه نجح بالرأفة تسكنوا في عمارته برده آه بصوت عالي

إصرار غريب على قول كلمة آه ، من طلاب جامعة بنها أمام د.هاني هلال وزير التعليم العالي والدولة للبحث العلمي، في زيارته التفقدية لمتابعة الدراسة ضمن جولاته التفقدية لجامعات مصر، كنت معه أستمع وأرصد أدق تفاصيل الزيارة، كنت قد تابعت قبل ذلك بأسابيع قليلة، وقفات احتجاجية للطلاب في هذه الجامعة بالذات، بعد أن حرموا من درجات الرأفة في الفصل الدراسي الثاني، حتى انهم رفعوا قضية ضد الوزير، وفعلوا كل الطرق لاثناء رئيس الجامعة عن قراره ،حتى انه اكتفى بإعطاء الراسبين خمس درجات رأفة فقط للنجاح.

في أيام دراستى في كلية الاعلام، كنت بتحسر على الدرجة أو الاثنين الفاضلين علشان أجيب جيد جدا، وفي نفس الوقت كنت أعرف زميل كان يحصل على 8 و9 درجات علشان ينجح في مادتين، وساعات كان مجموعه بفضل تلك الدرجات أحسن منى، ساعتها كنت بتغاظ وقول طيب ما أنا كمان لي الحق في نفس الدرجات مادامت درجات ببلاش، حتى الآن معرفش ليه الطلاب متمسكين بيها هذا التمسك الخرافي، بس ممكن يكون ليهم عذر ان معظمهم لا يحضر محاضرات وبيقضيها في جناين الجامعة ...

ساعات بحس إن الجامعات أصبحت مثل المدارس حوش كبير وطلاب قاعدين يأكلوا في الفسحة ساندوتشات ويشربوا كانز ، الطالب من دول ضارب جيل، ومسقط البنطلون تلاقيه لابس ثلاث حظاظات في إيده، وعمال يرفع المشروب وهو بيهز الحظاظات ويسبل، قال يعني خلاص توم كروز، والبنات الهابله حواليه فرحانين

شكل الجامعة لما يأتي المسئول الكبير بيبقى بيضحك، تلاقي طلاب الأنشطة واقفين طابور، ناقص يعملوا تمارين ويحيوا العلم ، عمالين يطبلوا، ويقولوا شعارات بتفكرني "أنا ان قابلت جماعة قلت السلام عليكمو أنا إن أنا إن... "كأنها مسرحية فكاهية أبيض وأسود من أيام زمان، اللى يفطس من الضحك، صور البلالين المنفوخه على شكل قوس قزح وقرد.. باين مش عارفه،  ناقص أسمع " يا نجاتي تعالي انفح البلالين علشان عملكم هلال والمحافظ والسادة الاعلامين جايين، 

أظرف حاجه لما عمكم هلال بقى يتعصب أصل الطلاب عمالين يسألوا أسئلة صعبة ،بقى عمال يرد على الأسئلة بشكل استفزازي، يعني طالب أسئلته صعبة من بتوع طلاب التيار الاسلامي مش أسئلة اتحاد طلبة خالص، بيسأل عن زيادة المصروفات وإن امكانيات اسرته لا تسمح بأى زيادة، والسؤال الثاني بتاعه عن تزوير الانتخابات الطلابية، رد عليه عمكم بالسؤال الاتي:انت معاك تليفون محمول؟ الطالب رد: آه، السؤال الثاني: طيب انت بتدفع على الشحن كل شهر كام؟، الطالب قال: خمسة جنيه ، عمكم هلال مصدقش، وقال: لا انتم بتدفعوا أكثر من كده بدليل المكالمات اللى بتجريها لمعرفة الاوامر لتنفيذها في الجامعة بتعليق لافتات والمشاركة في الانتخابات تحت اسم تيار سياسي معين، وبعدين شويه كده واتنرفز لما الطالب قالوه: أنا المفروض بتلقى تعليم مجاني طبقا للدستور، أوم إيه عمكم حاس انه معجبوش الكلام فرد عليه وقال :وانت فاكر يا حبيبي أن الفلوس اللى بتدفعها دي فلوس ،كأنه مثلا بيدفع الفلوس دي من جيبه الشخصى على الطالب، فعلا حتى الحوار الجامعي بقى يكسف !




  

12 comments:

dr.lecter said...

سلامات ياجامعه

عارفه ياداليا الجامعه بقت عباره عن مكان الطلبه تروح تقضي فيه اجمل سنين عمرها علشان عارفين ان مافيش حياه جميله بره الجامعه لما يتخرجوا
خليهم كده في الضياع وفي الطراوه علشان يعرفوا يتاقلموا مع الواقع اللي بعد 5 سنين

Dr Ahmed Fazary said...

أذيك ياأستاذة داليا
مامعني ضارب جيل؟

mohamed said...

حكاية الدركات بالرافة دي ملهاش اي علاقة بمستوى الدكتور او المهندس ليها علاقة بدكتور معقد نفسيا ومواد مشوهة ونظام دراسة متخلف وغبي مش بيعلم حاجة

انا البية الوزير فهما بقوا بلطجية من وزراء خالص
وخصوصا بتوع التعليم فاكرنها عزبتهم الخاصة واهم حاجة يلموا الفردة والاتاوة وميسبوش غالي يتفرد بتقليب المواطنين

R-H-S said...

درجات الرأفه دي القشه اللي بتنقذ الغريق
بس تقريبا كله بياخدها سواء اللي عاوزها او حتي اللي مش عاوزها

The Writer said...

عَ الجرح : ) ...

dalia said...

محمد لكترا
حرام عليك يا راجل، عايز شباب الجامعة اللى هما رجال المستقبل وقادة الغد وحاملي الراية وعلماء ومهندسي ومعلمي واعلامي مصر حسب الشعارات الرنانة بتاعت مسئولين اليومين دول يكونوا في الضياع
الجامعة كانت من السنوات الجميلة اللى عشتها في العلم والدراسة وحضور المحاضرات ومتابعة الندوات السياسية والانشطة علشان كده حياتي بعد كده كان لها طعم
أما اللى بيروح الجامعة يقضى وقت بيضيع نفسه ومستقبله وده اللى بشوفه في الخريجيين الجدد للاسف صحيح أن التكنولوجيا تطورت جدا في عصرهم بعني بقه عندهم المعلومة بس مشوشه وغير واضحة

dalia said...

أهلا فزاري
تمام الحمد لله، اما بالنسبة للمعني الحرفي لضارب جيل فحسب المعجم الشبابي فان من يضع "كريم جيل" على فروة رأسه يتناثر شعره واقفا من غير انتظام، متصلبا كالحجر مع لمعان، يبدو من بعيد كأن الشخص خارج من الحمام

واضح ان سفرك بره مصر أحدث فروقا في التوقيت الحرفي للكلمات
:-)

dalia said...

محمد الصديق الوفي

شوف طبعا انت لامست جانب مهم في درجات الرأفة يعني فعلا كتير بيبقى في دكاترة معقدين عندهم مثلا فكرة انهم يسقطوا كل الطلبه لانهم أغبية أو لانهم ميستحقوش وبره الخلل ده بيتعالج من خلال ما يسمى لجنة الممتحنين يعني لو الكلية لاحظت ان في دكتور مادة معينة ساقط كل تلاميذه أو درجاتهم كلها منخفضة بيعقدوا لجنة يبحثوا فيها رفع المجموع للطلاب وده بيتعمل بدقة شديدة علشان محدش يتظلم في مجموعه التراكمي يعني بتبقى زيادة محدودة في الدرجات
دي مشكل فعلا في مصر أنا بفكر أعمل تحقيق عنها ربنا يسهل ان شاء الله

dalia said...

R-H-S
أهلا بك منورني دايما فعلا ساعات بتكون درجات الرأفة مثل القشة اللى بتنقذ الغريق علشان كده محتاجين ان الغاءه يتواكب معها تفعيل نظام لجان الممتحنين اللى شرحته في التعليق السابق
شكرا على تعليقك

dalia said...

The writer
أو الكائن الازرق الفضائي :) والله محتاجه شرح
بس ليه جت على الجرح مش فاهمة ممكن توضيح

شوارعي said...

حال التعليم في مصر ليس أحسن حالاً من الكثير من الأمور المتشقلب حالها...

الازهرى said...

فكرتينى بأيام جميلة جدا جدا جدا من حياتى

تعرفى انا شاركت مرة واحدة فى النشاط الجامعى لما كنت فى تالتة كلية وهى تنظيم المؤتمرات العلمية
وكنت وقتها مجرد طالب عادى
وفى السنة اللى بعدها رحت الجامعة فوجئت انن انا اول امين للجنة العلمية بالكلية
وتصورى ما قدرتش انظم ولا حتى مؤتمر واحد الفرق ايه ؟
ان فى الأول كان عندنا عميد فاهم يعنى ايه مصلحة الطلاب ومعنى ان الطلاب يتلقوا العلم النافع

اما اللى بعده فاكن عارف معنى انه يحافظ على كرسيه ويسمع الكلام
ولا حول ولا قوة الا بالله