Sunday, June 14, 2009

بلاد العجائب




صراخ وأصوات غاضبة من هناك من أمام مقر وزارة التربية والتعليم ،قرون استشعار صحفية تشدني الى المكان ،أولياء أمور متجمعين وأب تحولت ملابسه من شدة الانفعال والحر الى مياه وأم مصدومة تبدو من نظرات عينيها عدم التصديق وسط كل هذه المشاعر الانسانية التى تجعل الصنم يتحرك لم يتحرك رجال أمن الوزارة ولم تشر تعابير وجوههم الى انهم بني آدميين لم أدرى بنفسى وانا اصور هذه الانفعالات بالكاميرا غير مصدقة ان هذا يحدث في بلد يقولون انها بتحترم الديمقراطية وحقوق الانسان كأننا في بلاد العجائب .

لست محررة في القسم السياسي لاحلل وضع النظام المصري أو انتقده ولكني انسانه عادية ارصد وارى ويكفي ما رأيته أمس ونشرته اليوم جريدة الشروق مزين بقلمي والصور التى التقطتها لاحلل وضع أمنى يحكم البلاد حتى ولو قالوا انه يتم في غيبة من المسئوليين التنفيذيين .

لست من أقرباء الطالبين اللذين حرما من دخول الامتحان ولكنني أحب هذه البلد وأرفض الظلم وأحب أن أضع نفسى مكان الاخرين أقول للمسئولين في وزارة التربية والتعليم يكفي هذا العبث ويكفي الحديث في البيانات الاعلامية على ان الوزير يعتبر الطلاب ابنائه يكفي أن جميع الجرائد اتخدعت في كلامكم بوجود غرفة عمليات لطلبة الثانوية العامة للرد على أى شكاوى لقد تعاملت معكم باعتبارى صحفية لمدة ثلاث سنوات وأعرف خباياكم وأعلم من الذى يكتب البيانات الاعلامية ومن يحسن وجهة الوزير دون أى اعتبارات على أرض الواقع حقا لقد سقطتم من نظرى في هذا اليوم وفي هذه الساعة لماذا تعاملون البني آدميين على انهم مواطنين درجة ثانية؟لا يكفي انكم انقذتم الموقف مؤخرا بالسماح للطالب بدخول امتحان اللغة العربية في الدور الثاني مع الاحتفاظ بحقه في الدرجات كاملة دون خصو ال50% طبقا للعادة ولكن عليكم ان تحققوا مع رجال الامن مثلما قمتم بالتحقيق مع موظف الادارة التعليمية الذى رفض دخول الطالب الى لجنة الامتحان.

من يريد أن يقرأ ما كتبته في الجريدة اليوم يقرأ على هذا اللينك



*-*-*-*-*-*-*-*-*-*-*-*-*-*-*-*-*-*-*-*-*


بعيدا عن حرقة الدم كان اليوم مميز جدا بالنسبة لي حيث مر عام كامل منذ عملي في جريدة الشروق احتفلت أنا والزملاء الذين مر عليهم هذه الفترة وقطعت التورته التى كانت كلها شوكولاته وكان رؤساء الاقسام موجودين مثل أستاذ عماد الدين حسين وأستاذ وائل قنديل والتقطتنا بعض الصور على فكرة كلكم اكيد هتعرفوني لاني البنت الوحيدة المتكررة في الصور وسبب اختياري لتقطيع التورته : لقد دخلت الجرنال ومكثت شهرين أو ثلاثة شهور لا أذكر وسط هؤلاء الزملاء الرجال الصحفيين الى أن توافد بعض الفتيات الى أن أصبحن أغلبية في غرفة الاخبار ،الاحتفال كان مميز جدا لان نسب المبيعات أيضا كانت خلال الايام الماضية مميزة جدا فكان احتفالنا حفلين بمرور سنة ولارتفاع نسبة المبيعات ،دعواتكم السكة مازالت طويلة.

18 comments:

الخوجة said...

موفق خير وعاوزين نسمع منك وعنك

ABOALI said...

انها المضحكات الباكيات فى زمن تعاظمت فيه البلاوى وقلت فيه كل الذوقيات بل قولى الاخلاقيات

اتقوا دعوة المظلوم فاءنها تخترق كل الحواجز مهما كانت

وهناك رب يرحم ويمهل ولكن الى ميعاد الكل راجع اليه

وان شاء الله تستقيم الاحوال

اما عن الاحتفال
فقد بحثت عن صورتك يا داليا فلما اجدها
ولكنى وجدت شمس حولها كواكب
فياترى هل انت من كان هناك
سؤال يستحق ان ينشر فور شروق الشمس ويقينا هى فى شروقها
عقبال العام الماسى

كريم بهي said...

داليا العقاد
اسمحي لي ان اعلق على بلاد العجائب
بجزء من قصيدتى اللى كان بسببها مشكلة فى حياتى مش ممكن ابدا انساها
اسمها
سُكر فوق جثة الشمس
ــــــــــــــــــــــ
المقطع الاول

وقتلوا فى بلادي
الشمس
مشينا جميعا فى العتمة
نهمسُ
من قتل الشمس ؟
جلسنا حول الجثة نبكي
صوتنا مغموس
قي بركة همس
لم نصدر حتى صرخة
أنا لست معكم
لانى سأصرخ
" من قتل الشمس؟
سأصرخ
" قد ماتت في بلادي
الشمس....
*
وما خفى كان افسد
****
وكل سنة وانتى طيبة
وعقبال 100 سنة صحافة
يوبيل ذهبي يعنى
وتبقى رئيسة تحرير
بس المهم والاهم
تكتبي عنى فى السنة العدد الصادر ليكي
فى احتفالية السنة المية حافة ليكي
وقتها تقريبا هيكون عندي مش كثر
120 سنة بس

تحياتى
وافتكري انك خلال سنة كمان هتكون من اشهر الصحافيات فى صر
وما خفى كان داليا العقاد

تجياتى
كريم بهي

mohamed said...

مبروك يا داليا مرور سنة وزيادة التوزيع

أما عن اللي حصل فدا كارثة من عدم تحمل المسئولية المفروض يتحاكموا عليها

dina said...

يا داليا انتى بتتكلمى فى حاجات غريبة...وزير....وزارة....تربية...و كمان تعليم....انا معرفش معنى لولا كلمة فى دول خصوصا لو اتجمعوا مع بعض و عملوا اكبر فشل انسانى (وزارة التربية و التعليم المصرية

و بعيد عن كل دا نقولك الف مبروك و عقبال 124576 سنة من القلم الحر و الكتابات المؤثرة

كيــــــــــــارا said...

دا انتي حثل خالث

واخيرا ثفتتتتتتتتتتتتتتتتتتتتتتتتتتتتتك


هييييييييييييييييييييييييييييييييييه

كيــــــــــــارا said...

ايه الكارثه دي

مش ممكن اللي بيحصل دا بجد حرقة دم

وانتي حاطه عامله يستره غليان مع كوووول طب ازاي

hager za3bal said...

انا كنت لسه بدور علي بلوجايتك عشان اقولك ان شوفت صورتك النهرده في الجورنال وانتي بتقطعي التورته :))

عموما
مبرووووك علي مرور سنه يا داليا ويارب مزيد من النجاحات..

لحظة تأمل said...

داليا

هى بلاد عجايب فعلا هنقول ايه بس؟
_____

الف مبروووووك
وياارب فى نجاح دايما
ويارب كل السنين الجاية تكون احلى
وانا متاكدة انك هتكونى من كبار الصحفيين ان شاء الله

دمتى فى سعادة :)

الست فرويد said...

كل سنة وانتى طيبة
:)

magi said...

بجد فعلا كم الاستهتار بتاع الناس ده فى مستقبل طلاب حرام وربنا يكونفى عون اهاليهم لان الثانويه العمه بتشكل بعبع لاولياء الامور قبل الطلاب
ومبروك مرور سنه على شغلك وبالتوفيق دايما

dr.lecter said...

كان غيرك اشطر

مافيش فايده فينا تجاوزات واهمال وتسيب ومسخره عن حق

مبروك علي الاحتفال

جريده الشروق بدون مبالغه انا بحبها وشايفها متميزه عن اي جريده تانيه في حيادها بالاضافه ان اللي بيكتبوا فيها معظمهم انا اصلا بحب اقرا لهم اووي

وفاء بركات said...

السلام عليكم
أولا ألف مبروك علي مرور عام علي عملك في بلاط صاحبة الجلاله وأتمني لك التوفيق
أول مره أزور مدونتك وكانت لقصد إني بأمنك ان ترسلي تهنئتئ للأبنه دنيا صاحبة مدونة أن لمشاعرنا أن تصرخ علي خطوبتها لأني تعذر تعليقي عندها ولا أعرف السبب
لي عوده لمدونتك لأن أذان الفجر لاح وحان وقت الصلاه
تحياتي

شبــ اون لاين ـــاب said...

السلام عليكم ورحمة الله وبركاته

اولا ناسف للغياب الطويل ده

علشان الامتحانات وكده

مبروك على العام ده

وانا عاوز حته من التورته دى

ههههههههه

فى رعايه الله

joker

انا حرة said...

انتى مصرة تفكرينى بالايام السودة بتاعت الثانوية العامة دى..و الكوميدى ان كل وزير يطلع يقولك السنة دى انا عندى تصور تانى خالص للامتحانات..و سبحان الله مناظر العيال و هى بتعيط و اخبار الانتحارات و الامتحانات اللى دايما فى مستوى الطالب المتخلف بيطلعوا علينا كل سنة

مبروك الاحتفال و عقبال السنة العاشرة..انا لسه مصرة ان اعلانات الشروق اقوى اعلانات لجريدة على مستوى مصر بحالها..ربنا يوفقك يا داليا ان شاء الله

مـحـمـد مـفـيـد said...

داليا
عقبال ما تبقي رئيس قسم
وبعد رئيس تحرير
وبعدها مش هتكلمينا
:)
بجد انتي تستحقي كل الخير
ولكن اصبري شويه هتلاقي كله تمام

dalia said...

الخوجة
أهلا بك زائرا للمرة الاولي في مدونتي شكرا لك
-*-*-*-*-*-*-*-*-*-*-*-
أبو على الفنان
أخجلتم تواضعنا يا فندم بس حرام عليك تظلم الشمس بالشكل ده:) واتفق معك يا ابو على ان دعوة المظلوم لا ترد والظلم ظلمات يوم القيامه كما قال الحديث الشريف يارب يكفينا ولا يجعلنا من الظالمين قول أمين منور دايما مدونتى سامحنى مقصره معاك بس غصب عني
-*-*-*-*-*-*-*-*-*-*-*-*-*-
كريم بهي
أهلا بالصديق شكرا لك بس انت متفائل قوي 150 سنة :) شعر جامد جدا ربنا يوفقك تعليقاتك دايما في الجون
-*-*-*-*-*-*-*-*-*-*-*-*-*-*-
محمد
منور يا محمد بجد وشكرا ليك مين اللى يحاكم بس ما انت صحفي وعارف :)
-*-*-*-*-*-*-*-*-*-*-*-*-*-*-
دينا
أهلا بك معلش يابنتي اصل انا كنت بتكلم عن كوكب تاني غير كوكبنا سامحيني المرة القادمة حصلح الخطأ شكرا لك
-*-*-*-*-*-*-*-*-*-*-*-*-*-*-
كيارا الشقية
انت اللى عسل والله ربنا يكرمك ودعواتك لي علشان انا عايزه دعوات كتير الايام ديه بالذات
-*-*-*-*-*-*-*-*-*-*-*-*-*-*-
هاجر
وحشاني والله ومقصرة معاك جااااامد جدا بس انا عارفه انك حتسمحيني لانك صحفية وعارفه ربنا يخليك يا قمر على المتابعة المستمرة
-*-*-*-*-*-*-*-*-*-*-*-*-*-*--
لحظة تأمل
معلش مقصرة معاكي جداا بس متشكرة على ثقتك في وده بيعطي لي أمل في مستقبل أكثر اشراقا في الشروق بس عايزينك تتابعينا يا فندم
-*-*-*-*-*-*-*-*-*-*-*-*-*-
الست فرويد
مدونتك مريحه جدا وشكرا للزيارة
-*-*-*-*-*-*-*-*-*-*-*-*-*
ماجي
أهلا بيك وفعلا انا مندهشه مثلك بس خهلاص حبطل اندهش علشان اقدر اشتغل شكرا ليك وربنا يخليكي والتوفيك لك أيضا
-*-*-*-*-*-*-*-*-*-*-*-*-*---
dr.lecter
يسعدنا تعليقك يافندم وكونك بتحب الشروق ده يسعدنا اكثر بس الاهمال ده احنا كمان السبب فيه احنا اللى مش عارفين نتعامل برقي تعودنا على المشقة والخضوع دون ان نفتح افواهننا تحياتي وشكرا على الزيارة
-*-*-*-*-*-*-*-*-*-*-*-*-**
وفاء بركات
وعليك السلام اهلا بك في مدونتي سامحيني من كتر شغلي بقيت مش عارفه حتى أعلق في مدونتي ولكن هذا دليل على مشاعرك الطيبة تحياتي لك
*-*-*-*-*-*-*-*-*-*-*-**-*-*
شباب اون لاين
يااااااااااااااااه أخيرا ظهرتم ربنا معاكم يارب النتيجة تكون مشرقة مثل اشراقكم شكرا يا جوكر وسلامي للاخوة باربي وابو مخ لاسع:)
-*-*-*-*-*-*-*-*-*-*-*-*-**-*-*
أنا حرة
شكرا ليكي يا ياسمين معلش اصل انا بتاعت تعليم يعني كل يوم من ده:) انا اللى دايما بقع في طلاب الثانوية العامة يعني رغم اني ماسكة التعليم العالي بس المصدافة البحته هي اللى خلتني اشوف الحدث ده مش كفاية اخويا عنده ثانوية لا كمان القدر بيحكم:) شكرا وتحياتي الراقية
-**-*-*-*-*-*-*-*-*-*-*-*
محمد مفيد
أهلا بك يا فندم وشكرا على الدفع الى الامام تحياتي الراقية

وفاء بركات said...

ربنا معاكي ويوفقك ...وأتمني عندما تصبحين صحفيه مشهوره ألا تنسي مشاكل العامه أوتكون مشاكلهم مجرد فرقعه من أجل الشهره وليست قضيه تؤمنين بها..
عذرا أن تكون كلماتي سببت لك ألما فقد فقدت الثقه في أصحاب قلم كانو بالنسبه لي أهرامات .. وهذا حالنا في الأقاليم ننظر للأعلاميين عموما نظرة مبعوث العنايه الألهيه مشكله إبعتي لطارق علام مشكله إبعت لنجوى إبراهيم الأن مشكله أبعت للبيت بيتك لواحد من الناس للعاشره مساءا ...الخ
ولاحياة لمن تنادى لأن المشكله ليست ستجني من ورائها مجد أوشهره وليذهب صاحب الشكله للجحيم
إعذريني فقد ضقت ذراعا لكلمات دون فغل وإيميلات دون رد وفاكسات تلقي في سلة المهملات
أتمني أن تكوني صاحبة رأى حر وقضايا
ترج العالم ويكون بها حل لإصلاح المجتمغ
أرجو ألا أكون أسقلت عليك .. تقبلي تحياتي