Tuesday, November 11, 2008

الفول يا نخلي عيشتكم هباب


بدلا من هتاف " الكباب الكباب يا نخلى عيشتكم هباب " التى هتف بها الفنان عادل امام ومعه رهائن مجمع التحرير في فيلم " الارهاب والكباب " ، كان طلاب الجامعة الامريكية بالقاهرة أو اذا شئت شوية دلع -إيه يو سي - على موعد مع اضراب في مطلع هذا الاسبوع بمقر الحرم الجديد أو -النيو كامبس - بالتجمع الخامس احتجاجا على التضرر الذى اصابهم من جراء انتقالهم من مقر الجامعة بالتحرير دون استكمال جميع الخدمات التعليمية والترفيهية .

ولفت نظرى أن بعض هتافاتهم وشعاراتهم كانت حول عدم توافر وجبات مصرية أصيلة مثل الفول والطعمية والكشرى ، آه والله العظيم الكشرى ، حد يصدق ده طلاب يدفع آبائهم مصاريف قد تصل الى 100 ألف جنيه ويشتكون من ارتفاع ثمن الوجبات الغذائية وعدم توافر الكشرى ! قرأت ده وشوفته في جروب على الفيس بوك ولكن الفضول جعلني اقرر الذهاب الى المقر بالقاهرة الجديدة لاسمع وأرى بنفسى وأعمل حوارات و" انترفيوز" بنفسى مع الطلاب ، معلش يا جماعة أصلي لساني اتعوج بعد هذه الزيارة بس هناك محاولات للترميم تجرى الان لعلاج الموقف
.

المهم قال لي طالب بالفرقة الرابعة بكلية هندسة " الواحد كان بيفطر بخمسة جنيه فقط دلوقتي أقل ساندوتش بخمسة عشر جنية ده حرام " وتابع " أنا لم أحضر الاضراب بس فعلا مصاريف الوجبات غليت جدا وكان المقر القديم في وسط البلد أسعاره أقل بكتير "، طالبة آخرى بالفرقة الثانية بكلية ادارة أعمال قالت لي وهى تضع سيقانها على المقعد وتسندها بالمنضده " المقر ده عاجبني جدا واسع وأجمل حاجه ان كل الكليات في مكان واحد بدل الشحططه من مبنى الفلكي لمبنى المكتبة للحرم الرئيسى " ثم استدركت " أيوه من حقنا ان نجد فول وكشرى في المقر الجديد علشان الجو يكون أحسن ".

أجمل حاجه في الموضوع أن ديفيد أرنولد رئيس الجامعة الامريكية استجاب لمطالب الطلبة وسمح لمطعم" العمدة " يفتح بجانب فروع المطاعم الامريكية الشهيرة مثل ماكدونالد وأخواتها في المجمع الغذائي ، طبعا شكل مطعم الفول تحفه واتبسطت قوى لان الحشود على مطعم العمدة كانت أكثر بكتير من مطعم ماكدونالد وبعيد عن السامعين-طلاب الجامعة الامريكيين- قلت في سري يلا خلى المقاطعة تشتغل.

بعد انتهاء المقابلات ركبت الباص بتاع الجامعة ورحت الشغل وطوال الطريق قلت الحمد لله على نعمة الفول والطعمية والكشرى ، فالنعمة ديه يشعر بها طلاب الجامعات الحكومية الغلابة نصيحة : يا ريت تبطلوا تعيبوا على الفول بعد كده

17 comments:

عمرو said...

الفول بهجة حياة الغلابه بس فعلا بقى غالى أوى أوى
و بعدين يعنى حنعمل أيه يا داليا ؟

شبــ اون لاين ـــاب said...

الا الفول

ده ثروه قوميه

و بعدين العيال دول بتوع الجامعه الامريكيه
دول فى عالم تانى

هاتى واحد منهم المجمع حتلاقيه اختفى و كش ومات

قال عايزين فول و كشرى و فلافل اللى هى طعميه عندكم

و ربنا ياخد اللى كان السبب فى رفع الاسعار

---------------------------
كان معك من امام الكيبورد
واحد مخه لاسع شويه
شبــ اون لاين ـــاب
الاسكندريه
------------------------

ضد التيار said...

عقبال لما حد يستجاب لمطالب الطلاب العاديين و الشعب

ABOALI said...

الفول ده غذاء العقول
مربى الاجيال وحامى حمى الاوطان
كله غذا واصيل حامى حمى وادى النيل
يا سلام على البروتين
تاكله وتحس انك فنان اصيل
يا فول يا حبيبنا
اوعى تروح وتسيبنا
احنا منك وانت منا
معاك معاك يا شراع مركبنا
الله عليك وانت فى الطبق منور
وكل يوم توصلنى مبسوط
لباب بيتنا
لا يحرمنا منك ابدا
يا رافع دايما راياتنا
الفول الفول
ان خلص الفول ان مش مسئول
وعجبىىىىىىىىىىى


موضوعك شيك جدا يا داليا
كل احاسيس وتعابير
تفطس من الضحك الباكى الضاحك
اشكرك بشدة
يا محافظة على تموين بلدنا

تحياتى


ملاحظه صغيره
الغى تاءكيد الكلمه من التعليق
وكفايه علينا الحكومة

Anonymous said...

هو الفول والطعمية الى تخلى عيشتكوا هنيه

شمس النهار said...

انا شايله المراره
بس كده هي طلعت تاني
الحمد لله

كـــيــــــــارا said...

الصوره طبعا معبره

انا من شهر يونيو مش فطرت في الجامعه

هي الدنيا غليت في المده دي ؟؟؟

حرية said...

بحق لهم الحق هؤلاء الطلاب ليس لانهم يطالبون بالفول والكشري ولكن لانهم لم يترددوا في المطالبة بحقة لهم ولو بسيط

تقبللا مروري

dalia said...

عمرو
أهلا وسهلا بك في مدونتى المتواضعة طبعا منور ، والله الفول لم يعد بهجه حياة الغلابة فقط زى ما شفت ، ممكن نعمل زى ما الطلبة عملوا في الجامعة الامريكية لو نقدر يعني

dalia said...

واحد مخه لاسع
اتفق معك ان الفول ثروة قومية بس مش بتفق معاك ان طلاب الجامعة الامريكية عيال لأنهم ناس عندهم حرية وفي نفس الوقت لديهم مسئولين على نفس مستوى هذه الحرية يعني مثلا جرب اعمل اضراب في الجامعات المصرية حتلاقى المسئول بيعند معاك وبيعتبر ان الاضراب ده قلة ادب وعمره ما حيلبى طلبات الطلبة لان المسئولين عندنا لا يقبلون بسياسة لي الذراع

dalia said...

ضد التيار منوراني دائما
انا كمان نفسي كل مطالب الطلبة يتم تحقيقها في الجامعات المصرية ويبطل المسئول يفتكر انه بيمن على الطلبة بسكن في مدينة جامعية أو كرسى في قاعات المحاضرات أو بتعليم مجاني
تحياتي

dalia said...

يا فول يا حبيبنا
اوعى تروح وتسيبنا
احنا منك وانت منا

حلوه الكلمات يا فنان انا بتفق معاك في الشطر الاخير لاني بموت في الفول ومقدرش استغنى عنه في الفطار او العشاء ويا سلام لو كان مع العيله على النيل

dalia said...

المجهول
طبعا ربنا يخلي لينا الفول

dalia said...

شمس النهار
نورتي مدونتى شكرا على مرورك
لا الا المرارة

dalia said...

كيارا الجميلة الشقية
امال بتفطرى فين ؟ ويا ترى بتحب الفول ولا آيه

dalia said...

محمد علاء الدين
طبعا اتفق معك في ما قلته
اشكر لك مرورك
طبعا نحن زملاء في مهنة احدة وهذا يسعدني

mero-moory said...

السلام عليكم و رحمة الله و بركاته
تعرفي يا داليا برغم انه بيتعبني بسبب لقولون بس بحبه جدااااااا
وبجد سعيده اوي ان ده حصل في الجامعه الامريكيه يااااه تطور كبير جدا

سبحان الله مصر موش تبقى مصر من غير اكلاتها المشهوره الفول والطعميه والكشري


موش بيقولوا اللي ياكل الفول المصري عمره ما يجيله تسمم او ينسى مصر

بيكون كل حاجه فيه جامده وصعب يتاثر بس ياترى ده فعلا صح ولا دي ثورة مؤقته

وانا معاهم كله الا الفول رغم انه بيتعبني

ميرسي ليكي يا قمر

في رعاية الله