Tuesday, August 17, 2010

عريس يا ماما

فعلا شر البلية ما يضحك، لا أعلم تذكرت هذا المثل وأنا أشاهد لقطات متقطة من مسلسل عايزه اتجوز الذى يعبر بشكل جرئ وساخر عن مشكلة تعان منها الاسر المصرية، بقدر ما ضحكت من قلبي ،شعرت بمهانه داخليه وانا أشاهد هند صبرى وأمها سوسن بدر متشحتفتان على عريس، كان ناقص تلبسان ملابس ممزقة وتقفان على ناصية بيتهما وتقولان عريس يا ولاد الحلال ،عريس أبيض ينفع في اليوم الاسود

بعيدا عن السلبيات والمبالغات التى وقع فيها المسلسل حقيقي شعرت ان غادة عبد العال زميلتنا في جريدة الشروق استطاعت أن ترصد  ما يحدث في البيت المصري الذى بات يخاف على بناته من العنوسه، مواقف الأم وهي تجعل قضية الزواج كأنها القضية الاستراتيجية الاولى للأسرة، والأب المجبر على شراء قطع الجاتوه كل زيارة للعريس، والأخ الأصغر وموقفه المضحك من العرسان، والجدة التى تحاول أن تتلصص لعل هناك خبرا سعيدا في الطريق، والبنت التى يعلوا وجهها حمرة الخجل وهي تنطق عررررريس يا ماااااامااااا ،والعريس نفسه ومواقفه الغريبة والمثيرة ما بين واحد مستعجل وآخر نصاب وثالث منخيره لفوق، ورابع وخامس داخلين خارجين، خارجين داخلين البيوت.

 والبنت مع كل داخله يتبدد لديها يأس العنوسه  ، ويتجدد عندها أمل الارتباط والفستان الأبيض والكوشه واللحظات السعيدة، وبعد كده ينتهى الحلم مثل الأفلام القديمة وخلفوا صبيات وبنات وتوته توته فرغت الحدودته.

  المسلسل استطاع أن يجذب الطرفين للمشاهدة الشاب والفتاة ، هذا ما لاحظته في صاله التحرير عندنا ، وطبعا ليس السبب ان الشروق انتجت هذا المسلسل أبو دم خفيف في أول انتاج لها -قال يعني سايبن اشغالنا وقاعدين بنشجع مؤسستنا-لا لان المسلسل بيتكلم في مشكلة صعبة بطريقة سلسله فشعرت  مع كل حلقة هناك رسالة ما يجب أن يجد لها الجميع حلا

في مواقف ضحكت عليها جدا، لأنها فكرتني بأوضاع كثيرة متشابهه حدثت في بيتنا  مثل قيام الأم وبنتها بعمليات التنظيف الشديد للبيت قبل قدوم العريس، واهتمام الأم بأدق التفاصيل ،ياااه بداية من الملبس  لرابطة الايشارب الى الحذاء الذى سأرتديه  ورابطة العنق الخاصة بالأب، قيامها بتوفير كل ما يلذ الأعين من عصائر وجاتوه وحلويات وابتسامه عريضه بارك الله في أمهاتنا جميعا:)
:))

 في رأيي  تكرار كلمة عايزه اتجوز  محرجة ولا يقبلها حيائي لأن النصيب والقضاء والقدر كلها أمور أؤمن بها، لكن المهم جوهر الارتباط ،بعتقد أن ظهور العريس ليس نهاية المطاف هناك مسئولية يتحملها الأب والفتاة في اختيار شريك حياتها ، أعلم ان الأمر لم يعد سهلا مع ندرة العرسان، ومع الظروف الاقتصادية الصعبة التى نعيشها، و الظروف الاجتماعية التى لا تجعل الشاب يخاطر بحريته في سبيل تجربة يراها مرعبة هذا واضح.

 من المهم أن تترك الأسرة للفتاة أن تختار الرجل الحقيقي الذى سيسعدها  دون الوقوع في فخ ارضى وخلاص بلاش دلع يا بنتي هو احنا لاقين عرسان،
والكلمات التى تعرفها جيدا كل بنت

الاخلاق الحسنة والرجولة الحقيقية والتكافؤ في المستوى الاجتماعي والاقتصادي والتعليمي وقبلهم الدين، كلها أمور يجب أن نراعيها ، و التأكد من قدرة كل من الفتاة والشاب على هضم المغزى الاساسي للزواج في بناء أسرة صالحة في المجتمع لكي تضيف لبنه طيبة الى بناءه اذا كنا نريد لهذه البلد أن تتغير الى الافضل..

.

20 comments:

dr.lecter said...

المسلسل ظريف بس مابتبعهوش كل يوم لاني قاري الكتاب مليون مره
الغريب ان اختي وهي متزوجه وامي وخالتي بيتابعو المسلسل رغم اني كنت متوقع ان البنات هيهتموا به اكتر من المتزوجات

عامه هو غالبا ده العمل الوحيد اللي ينفع العايله تتابعه بعيدا عن عري علا غانم وغاده عبد الرازق والاخت ميريام فارس اكرمها الله

كيــــــــــــارا said...

ازيك ياداليا وحشتييييييييني

كيــــــــــــارا said...

يصي انا مش اتفرجت عليه ولا مرة لكن بتفق معاكي في كل كلمة قولتيها

الجواز مش دبله وزفة وفستان ابيض وبعد كدا نغني ظلموه ظلموه

لا دا كيان بيتبني

كيــــــــــــارا said...

رمضان كريم يادودو

noha musad said...

هوة المسلسل بيعبر عن مشكلة بتعاني منها معظم البنات في العصر الحالي وبالرغم من ان في مبالغة بس المسلسل بيعرض حاجات واقعية جدا في صورة ساخرة
http://www.eyelasik.zxq.net
http://www.egymagic.blogspot.com
http://www.englishstance.blogspot.com

زين الدين said...

احسب انك لمست شيئين
احدهما مشكلة فعلية في المجتمع
ثانيهما القصد والغرض من الزواج

وتعليقي علي النقطة الاولي ومن وجهة نظري انها الذنوب التي تذهب البركة والخير من المجتمع
"ولو ان اهل القرى امنوا واتقوا لفتحنا عليهم بركات من السماء والارض..." الاية
ومن الممكن ان يعارضني كثيرون ويقولون اسباب اقتصادية او ديموجرافية اعداد النساء والرجال او اخلاقية ...
ولكن علي سبيل المثال اذا سالنا انفسنا ما هو سبب الضغط الاقتصادي ... ممكن لان حكام البلد حرامية وموظفي الحكومة والشرطة "الشعب" بيجري علي لقمة العيش سواء حرام او حلال او علي دماغ غيره وانتشار الانانية ..... طيب ليه
بسبب غياب الضمير من الشعب وبالتالي الحكام
وما هو الضمير اقول لك هو خشية الله وتقواه وده مثل بسيط من فروع كثيرة الي اصل السبب
ثاني نقطة
هو اكرمك الله الذي اشرت اليه مفهوم الاسرة التي هي لبنة اساسية في بناء المجتمع ، وليست مجرد "لكي لا يقال اني كذا او مظهر اجتماعي او خلافه
وكما اشرت وكان ايجازك رائع لنهضة الامة

الاسرة لبنة في بناء المجتمع وان لم يكن طرفاها متكافئان فاهمان للمسئولية فستكون شرخ في جدا المجتمع يوشك ان ينهار بسبب تلك اللبنات
واختم بالاية "وقلت استغفروا ربكم انه كان غفارا يرسل السماء عليكم مدرارا ويمددكم باموال وبنين ويجعل لكم جنات ويجعل لكم انهارا"..الاية

حَـبآيـۃْ.بـטּـدۉڷ said...

المسلسل فعلاً قصته طريفه .. وليه أفشات حلوه جداً ..

اممممممم .. زي ما قولتي يمكن مبالغ حبتين .. يمكن الحياء فيه قليل شويه .. لكنه عالأقل حاجه تقدر الأسره تتجمع عليها وتابعها .. :)

رمضان كريم :)

Hager ZaǮbal said...

اولا كده
كل سنه وانتي طيبه يا داليا :)
* معلش جايه متأخر شويتين :$

ثانيا بقي
عارفه، كل حد هاجم المسلسل قلتله اقرا الكتاب !
هو فعلا المسلسل مبالغ فيه حبتين تلاته ، بس رغم كده برضو عجبني !
اتبعوا فيه اسلوب شر البليه ما يضحك زي ما فعلا انا كمان افتكرت المثل ده لما شفت حلقات منه ..
ومواقف كتييييير اوي قعدت اضحك عليها وانا زعلانه في نفس الوقت ، الموقف فعلا صعب ..

عرض علي الناس مشاكل كتير بتحصل في بيوت كتير في مصر ..
الميزه ان مش كل الناس ممكن تقرا الكتاب لكن المسلسل هيكون ليه جماهيريه عريضه ..



ثالثا بقي وده الاهم
عايزه اقولك مبرووووووووووووووك :)
فرحت اوي لما شفت الصور والبوست اللي فات
ويارب تحققي كل اللي بتتمنيه

محاولة للتفاؤل said...

المسلسل لطيف لكن فيه مبالغات كتير طبعا، والكتاب أحلى منه بمراحل.
بتقولي تكرار كلمة "عايزة أتجوز" محرجة، بس هي ليه محرجة؟ هو دا مش مطلب طبيعي؟ هو مش ربنا خلقنا عشان نعمر الأرض؟ المفروض الكلام في الموضوع دا يبقى عادي جدا

الحاجة التانية الي الواحد ملاحظها بقى أن بقى فيه بنات كتيييييييير جدا مش متجوزين، رغم انهم جمال وأخلاق وتعليم أحسن مستوى وبيشتغلوا كمان..لكن افتكر أن الأسباب دي نفسها هي الي ممكن تخلي البنت ترفض ترتبط بأي حد والسلام
بصي حواليكي كدا هتلاقي البنات مكتسحات معظم المجالات وقاعدين يتقدموا اكتر واكتر بمرور الوقت، فين بقى الرجالة الي تناسب الكلام دا؟ ادخلي أي كورس هتلاقي 80% بنات..فبن الرجالة؟ على القهاوي طيعا

بتقولي "التكافؤ في المستوى الاجتماعي والاقتصادي والتعليمي وقبلهم الدين"..تفتكري دي حاجة لسة موجودة بجد؟؟ انا حاسة أنها بقت حاجة زي العنقاء والغولة والخل الوفي

dalia said...

أهلا لكترا
أيون بالظبط هو ده المسلسل الوحيد اللى ممكن العيلة تتابعه ربنا يهدي،بس مش غريب ان المتزوجات يتابعوا وانما الغريب هو الاهتمام الذكوري به
بس يمكن لانها مشكلة مشتركة وعامة

dalia said...

كيارا أو منى
ازيك يا قمر الله أكرم وانت أوحش :)
بس حلو ظلموه ياعيني على العقل والحكم فعلا ده كيان بيتبني زي العمارة يحتاج تأسيس كويس علشان ميقعش من أول هزه
مع حبي

dalia said...

نهى
نورتنينى بتفق معك تماما واتمنى ان نكون على تواصل رمضان كريم
تحياتي

dalia said...

زين الاخ الجميل
متشكره على التعليق رغم اني عارفه انك مشغول وبتذاكر
شوف كل المشكلات ممكن تحصل لو ما طبقناش الاسلام بشكل صح واكتفينا بمظاهره فقط، يعني كل اللى بيحصل من ذنوبنا ، انت عارف يا زين أنا ساعة ما بقيت مسئوله عن تدريب بعض الصحفيين المبتدئين ولو غلطوا مثلا مرة ثم كرروا الغلط مرتين بحس اني لازم اتلكم معهم بحدة وأعاقبهم سبحانه المثل الاعلى هو تعالي مستحمل كل الاخطاء والذنوب وعمال يرزقنا ويلبي دعواتنا علشان كده أحنا شعب يستاهل يتاخذ فوق دماغه لانه سلبي وبعيد عن الدين في عدم السكوت عن الظلم انا عاجبني قوي مقال لعلاء الاسواني
ياريت تقرأه
http://www.shorouknews.com/Columns/Column.aspx?id=284178

dalia said...

حباية بندول
منوراني ورمضان كريم عليكي، واضح ان المسلسل عجبك، هو مش بطال زي ما انا قلت بس المبالغة أحيانا تفسده
ياريت نكون على تواصل
تحياتي

dalia said...

هاجر الحالمه
ازيك يا بنتي وحشاني كتير، طبعا متأخره بس المهم انها جت::)
كل عام وانت اقرب الى الله
انت عارفه انا لسه حقرأ الكتاب واكيد حتكون تجربة ثرية ، أنا مثلا معجبة جدا بكتاب دعاء الكروان لطه حسين أكثر من فيلم هنادي بعتقد أن القراءة عشق لوحده
انا برده عجبني الفكره المسلسل خلاني اتعاطف مع علا كتير لدرجة اني كنت بحزن من الموافق الى بتتعرض ليها وده في حد ذاته نجاح

الله يبارك فيكي عقبالك لما تتصوري بكارنيه النقابة بس افتكري تعزميني على حفل النقابة
حبيبتي لا تختفي مره أخرى:)

dalia said...

محاولة للتفاؤل
أهلا يا بسمه كنت حاسه انك حتكوني في تعليقك حاجه مختلفه خالص، لان مدونتك بتعبر عن ده وده حاجه كويسه قوي

بس يا ستي أما ليه بقى كلمه عايزه اتجوز محرجه جربي كده مثلا في ميدان التحرير صرخي وقولي أنا عااااااااايزه اتجوز شوفي الناس حتقول عليكي إيه، الطبيعي ان البنت هي اللى بيتقال لها انا عايز اتجوزك مش العكس والا خلاص كانت الايه اتقلبت البنت تروح تخطب الولد اللى هي عايزاه بس مينفعش علشان حياء البنت والمجتمع بيعتبرها في الحاله دي بجحه ومش قادرة تصبر

آه انا متفقة معاك في النقطة التانية بس في والله شباب مجتهد وبيسافر وبيتعب قوى علشان يجيب لقمة العيش بس بيتأخر عقبا لما يقول يا جواز ومنهم بيطلب واحده عندها 22 سنة وهو في الاربعين

تصدقي مسألة التكافؤ دي عايزه صبر أيوب بس مينفعش غيرها في الجواز انا مش بصدق كلام المسلسات والافلام في المواضيع دي

اقصوصه said...

رمضان كريم

مبارك عليكم الشهر

وكل عام وانتم بخير :)

شهرزاد said...

الحقيقة موضوعك او تقريرك جميل جدا ورائع وأصبت جدا فيه

"في رأيي تكرار كلمة عايزه اتجوز محرجة ولا يقبلها حيائي لأن النصيب والقضاء والقدر كلها أمور أؤمن بها، لكن المهم جوهر الارتباط

وهذه الجملة أيضا اعتقد انها جوهر الموضوع
وتزيد من اعجابي بشخصيتك وآرائك

وقد كنت من متابعي حلقات المسلسل
وقد عجبني جدا لأنه من واقع حياتنا وتعيشه كل بنت

ارجو لك التوفيق دائما

تحياتي

dalia said...

اقصوصة
أهلا بيكي
كل سنةوانت طيبة يا قمر منوراني دايما
تحياتي

dalia said...

شهرزاد الجميلة
ازيك وحشاني جدا، مبسوطه قوي انك متبعاني مش ناويه ترجعي تدوني أنا مستنياكي وحيفضل عندي أمل انك ترجعي تكتبي تاني لانك فعلا مميزة ولك لون مميز في الكتابه
أما بالنسبة للموضوع ده فعلا المسلسل واقعي ويناقش أشياء موجودة وممكن يكون ده طريق جيد للبحث عن حل له قولي أمين